Avanse edition 4

9Edishon No.4 Mart 2015 Resientemente Avanse a tene un entrevista ku Terrence Agard esaki en konekshon ku su partisipashon na Hulanda kompetiendo den kareda di pia 22 di febrüari último i a keda na di 3 lugá. Agard for di aña pasá na luna di novèmber ta na Hulanda i huntu ku un selekshon Hulandes nan a bai Zuid Afrika pa un kampamentu di ehersisio. “Awor mi ta na Hulanda for di novèmber aña pasa i den e mes un luna aki ami huntu ku un selekshon Hulandes a bai Zuid Afrika pa un sekshon spesial di ehersisio ku a dura mas o ménos 1 luna. Tabata un eksperensia hopi dushi, mi a siña hopi mas di kiko atletismo ta enserá den su totalidat. Nos a haña chèns di eksplorá Zuid Afrika tambe bishita entre otro Robben Island kaminda tin e prison ku Nelson Mandela a sinta mayoria di su kastigu, i tambe nos a bai den Safari. Pa bini bek riba mi presentashon di EK mi mester bisa ku mi no tabata plania pa Indoor e aña aki. Mi mester a bini Kòrsou bek desèmber pero sinta den un restorant na Afrika mi a disidí ku mi ta bai kompetí na Indoor. Ta algu ku nunka mi a hasi promé, i ta un reto nobo p’ami. E pista di In- door ta 200 meter i kompará ku riba tereno pafó ta 400 meter. Indoor bo ta hañabo ku e bògt nan hopi mas skerpi i skùin. Mi a papia ku mi coach Hulandes tokante e idea i deseo ku mi tabatin pa partisipá na Indoor i el a bisami,”bo tin sigur ku bo ke hasi Indoor, paso e kareda ei ta totalmente otro for di pafó.” Sin pensa dos bes mi a kontest’é “si,” mi tin sigur, mi sa di mi kapasidat i mi ke bai Europese Kampioenschappen. Na prinsipio di e preparashonnan tabata difísil pa praktiká den e friu pafó. Sigur ora mi mester a kore e distansia nan basta largu ku un klima friu no tabata nada fásil. Ta algu ku nunka promé mi a hasi. Sin menshoná tambe ku Desèmber semper mi ta na Kòrsou ku famia ora di Pasku i aña nobo. Pero ora bo tin un meta bo dilanti bo mester sakrifiká pa bo logra, esei ta parti di bida. Awor ora mi bira wak patras mi ta hopi satisfecho kuantu mi a pusha anto keda di focus pa lokual mi ke. E kompetensia tabata dia 22 di febrüari último i mi a keda na di 3 lugá den EK limiet koriendo 400 meter Indoor ku un bunita tempu di 46.77sekònde. Tabatin momentu ku ami a bisa dikon mi ta den e friu aki mes, hopi hende tambe a puntrami si ta loko mi ta paso mi a bini for di Kòrsou kaminda ta e klima ta diferente esta kayente pa bini den friu bin hasi Indoor. Tabata mi deseo i niun hende no por a drenta den mi kaminda pa kambia mi pensamentu. Awor preparashonnan pa EK a inisiá i ta bayendo hopi bon. Mi ta siñando ainda riba e parti táktiko pa kore Indoor i ku Dios su poder lo mi hasi bon papel na Praag i saka kara di Hulanda i spesialmente di Kòrsou. Motivashon Semper mi a soña di gana un medaya olímpiko, esei ta mi soño. Esei ta motivámi p’ami bai trein tur dia pa asina logra mi metanan. Mi famia sigur ta un di mi motivashon mas grandi. Semper nan tei p’ami, i esei tambe ta dunami e gana di duna mas di mi parti. Algu di mi mes Mi a kuminsá ku atletismo for di tempu ku ami tabatin 9 aña. Na skol semper mi tabata hopi okupa i semper manera nos haña chèns nos tabata kore na skol. Asina nos dosente yùfrou Loo di e tempu ei a bisa mi mama pa hinkami den atletismo i asina kos a kuminsá te dia di awe. Skolnan ku mi a bai ta M.M Romerschool, PSC un aña, despues mi a bai MIL kaba HAVO. Awor mi ta na ICUC ( Inter Continental University of the Caribbean) situá na Brionplein. Otro deportenan ku mi gusta ta futbòl. Mi gusta futbòl hopi, pero lástimamente mi no por hasi esei kombiná ku atletismo paso ta dos deporte diferente i tambe e chèns pa leshoná ta hopi mas grandi ora di futbol. Tambe mi a praktiká landamentu pa hopi aña. Mi a kombiná landamentu ku atletismo pa 10 aña largu. For dia mi 8 aña te ku 18 anja. Pero na dado momentu mi mester a skohe pa un deporte so. Tambe pa un tempu kòrtiku mi a hasi tènis na edat hopi yòn 5 aña. Mi tata Reginald Agard a hasi Tènis tambe ántes i a representá Kòrsou na weganan di Centro Amerikano y del Caribe tambe na Colom- bia. Mi tabata landa ku ta Bulado swimming club anto e aña ku mi tata a partisipa na Centro Amerikano y del Caribe ( C.A.C) ta na Colombia 1978. Asta Basketbòl mi a práktika pa un temporada ta parse manera hopi kos mi tabata hasi, pero mi gusta hasi deporte. Hasiendo esaki mi ta sintimi hopi bon. Mi ke bisa ku semper hasi bo esfuerso i duna lo maksimo. Tin tempu difísil kaminda e opshon di mas fásil ta pa stòp. Esei ta delaster desishon ku bo mester tuma pasobra bo a kuminsá kaba. Sigui kere den bo mes i semper duna 100 %. Pasobra nada riba e mundu aki bo no ta hañ’é pòrnada, bo tin ku paga ku Tempu, sakrifisio, esfuerso i sodo.” Fotos di Erik van Leeuwen TERRENCE AGARD PREPARANDO PA EK Semper mi soño tabata pa gana un medaya olímpiko Hulanda

Avanse edition 4

Pages Overview