Avanse edition 4

11Edishon No.4 Mart 2015 Skibi pa Boi Antoin Dia 31 di yüli 1960, segun Ensiklopedia di Antia Hulandes, Tele-Curaçao a kuminsá transmití su programanan pa Kòrsou i Boneiru. Tabata un kos grandi pa e tempu ei. Mi mes tabata mucha i ta kòrda bon kla ainda e programanan di televishon dje tempu ei. Te awe nan ta hasi impreshon riba mi. Mi mayornan no tabata hende riku. Nan mester a lucha pa sobrebibí i pa lanta no ménos ku ocho yu den dékada trinta, kuarenta, sinkuenta, sesenta i asta, parsialmente, setenta. Pasobra nan a riska produsí dos yu te den lat. Un di nan tabata “bo sirbidó”, manera nan sa bisa na manera dèftu. Nunka m’a mira mi tata traha. E tabata penshonado i hañando sintí mi a mir’é ta traha den kurá, lora man den un tienda den kurá di nos kas i tambe bai su kunuku. Pero tòg nos tabatin un televishon na kas. Mi ta riska bisa ku esaki tabata e promé aparato di televishon, a lo ménos un dje proménan, den Antriol. Mi ruman Violeta (esun di tres), konosi tambe komo Popo, a kumpra e aparato aki na e empresa Handelmij ku tabata representante di Phillips na Boneiru. Medardo Thielman, mi padrinu, a bin instalá e aparato na nos kas. Mi ta kòrda esaki bon ainda, anke apénas lo mi mester tabatin un 6 pa 7 aña asina. Medardo sa bini nos kas mas bes. Aparte ku mi tabata su ihá, m’a yega di sirbi brùit tambe dia ku el a kasa ku Yuyu. Ademas mi mayornan tabata bon miembro i votadó di Partido Progresista Boneriano Uní (PPBU), partido di Medardro. Pa mi mente di mucha e aparato aki tabata un kashi. I tabata pone kos di prònk tambe riba dje, meskos ku un kashi. Pero den e kaso aki un kashi ku su pantaya. Un pantaya den kua hende tabata kana, kore, sinta, drumi, papia. Un pantaya den kua bo por a mira outo i trùknan grandi kore, kabainan galopiá i tiru zona. Tabata tempu ku pelíkulanan di kòbòi tabata manda mundu. Tempu di serinan di televishon manera Highway Patrol, Pancho y Sisco, Bat Matterson, Man from UNCLE, The Fugitive i algun otro seri mas. Pa mi e entrada di e aparato televisor aki den nos kas tabatin un impakto sumamente grandi. Mi no por a kaba na komprondé ku mi mente chikí, kon por tabata posibel ku un par di hende tabata move den e kashi aki. Oranan largu mi tabata pasa drumí òf sintá dilanti televishon ta pensa i studia kon esaki tabata posibel. Te awe mi no tin e kontesta. Anto pa kolmo, produsiendo e programa ‘Herensia’ despues, mi mes tambe a bira un dje “pòpchinan” den e kashi aki, anto pa kolmo na koló. Kurioso i trimintí, manera semper mi tabata, na hopi okashon mi no por a resistí e tentashon, ora ku niun hende tabata wak, pa kue un skrufdrai di strea di mi tata, pa lòs e karton patras pa mira si e hendenan ku mi tabata mira anochi riba e pantaya, por tabata drumi sosegá nan kurpa durante dia den e aparato. Pero ta algun lampi i waya so mi tabata mira. E mishonnan eksplorativo aki tabata sosodé lógikamente fuera di konosementu di tur otro hende. Spesialmente di mi tata, ku no ta basilá pa hasi uso di e servisio di un faha ku e sa tin kologá na muraya den su kamber, komo medio korektivo ora ku mi komportá mi mes ménos bon òf te asta malu. Mi no por bisa ku e tabata karisiá mi kueru ku e faha aki. Mi tata mes nunka tabata gusta wak televishon. E tabata haña e aparato ei ko’i bon bida. Ta hendenan ku no tin nada útil pa hasi, na su konsepto, tabata sinta wak televishon. E no tabata sa mes kon pa sende òf paga e aparato. Echo si ta ku e tabata preferá mira e aparato aki pagá ku sendé, pasobra sendé tabata nifiká algun diesplaka mas riba resibu di koriente. Programa di notisia tabata na enkargo di Eithel Hernandez, miéntras ku su esposa, Saida, tambe tabatin algun programa “live”. Entre otro programa pa mucha. Programa di Tante Saida. Komo mucha mi tabata gusta kana sunú den kas. Pero na momentu ku e aparato televisor marka Phillips aki a drenta nos kas, anke di un banda el a trese dibershon, di otro banda el a bin kibra mi privasidat. Kanamentu sunú a kuminsá pasa pa historia, pasobra mi tabata bou di e impreshon, asta por bisa kombensí, ku si mi kana pasa sunú dilanti televishon, e hendenan den televishon, spesialmente Eithel Hernandez i konsorsio, pues e presentadónan lokal, tabata mira mi sunú. Den e promé dianan, promé ku mi pasa dilanti e aparato, mi tabata lora un sèrbètè rònt di mi kurpa, tapando “mi mucha hòmbru”, manera nan sa bisa, pa sigur Tante Saida no mir’é. Despues di tempu m’a disidí di laga e kustumber di kana sunú den kas un banda i a kuminsá bisti karson. Ta opvio ku nos besiñanan, prinsipalmente muchanan den Antriol i Nort di Saliña, tambe a bin deskubrí ku nos tabatin televishon na kas. I nan a kuminsá haña kaminda pa nos kas tur anochi, pa asina gosa di e programanan di Tele-Curaçao. Mi por a ripará ku hopi di nan tampoko por a komprondé i aseptá ku for di e kashi aki imágen di hende tabata sali. Nan tabata diskutí nan ku nan riba e fenómeno aki. Tambe mi ta kòrda ku den e promé dianan ei algun persona di edat mas haltu a pasa tira bista riba nos televishon anochi. Ku masha atmirashon i rèspèt nan tabata para opservá e aparato. Tin di nan tabata hisa kara na shelu, gradisiendo Dios na bos haltu ku El a duna nan bida pa por a mira e milager aki. Pasobra, pa nan tabata un milager sigur. Pero ei mes tabatin den nan, e bon baidónan di misa, ku tabata konsiderá televishon komo ko’i diabel. Ma ora ku nan pastornan a kuminsá ta hasi uso di e medio aki pa komuniká ku pueblo, nan pensamentu ku ta kos di diabel a kambia pa kos di Dios. Mi mama, Blanca, tabata un tipo di mènedjer dje aparato mágiko i misterioso aki. Na promé instante e tabata gusta masha ku tantu hende asina tabata bin nos kas pa wak televishon. Pero mas bien esaki tabatin un rason komersial, konsiderando ku e tabata bende li di lechi i tambe di kuleit ku e bishitantenan. Negoshi di li tabata bai bon i tabata yuda kubri e gastunan di koriente i te asta sobra. Asina dia, siman i lunanan tabata pasa. Un ambiente úniko tabata reina e anochinan ei. Un ambiente ku nunka mas mi por lubidá. Kantidat di hende na kas sintá dilanti televishon. Generalmente e bishitantenan tabata komportá nan mes bon. Mi ta kòrda sinembargo ku na algun okashon tabatin problema basta serio. Tin bes un tabata stroba e otro. Otro bia un mucha ta puya (si mi mama tabata na bida ainda lo mi a skirbi aki ‘saka bientu’) den kara di un otro òf un di nan su pia tabata hole muchu keshi. Blanca tabata severo. Si surgi pleitu, e tabata paga televishon. Komo straf niun hende por a wak televishon mas e anochi ei, sin importá ki bon pelíkula tabatin. Tin bia e sensura aki tabata konta pa mas dia tambe, te asta siman. E posishon monopolístiko di mi mama sinembargo no a dura hopi mas, komo ku e aparato di televishon a resultá un bon zèt promoshonal. Mas hende a bin haña televishon na nan kas, poniendo ku e teater na nos kas a pèrdè su bishitantenan. E negoshi di li tambe a bai den un krísis formal. TELEVISHON DI POPO

Avanse edition 4

Pages Overview