Avanse edition 4

7Edishon No.4 Mart 2015 MASHA DUSHI MES Un amigu di mi ku yama Cedricus (no ta su nòmber original) tin e kustumber ku ora hende puntré “kon ta?” semper e ta kontestá “masha dushi mes!” Promé mi tabata bou di e impreshon ku Cedricus ta gosa di loke yama na Franses: “Joie de vivre” (na Hulandes “levensvreugde”) òf alegria di bida. Durante di añanan di nos amistat, pokopoko mi a kuminsá komprendé ku ora ku e ekspresá “masha dushi mes”, p’e e kiermen algu muchu mas fuerte ku esei. Partikularmente, mi a ripará ku te asta ora algu ta bayendo robes i e ta kunsumí òf tin mal beis tòg semper kosnan ta “masha dushi mes”! Mi a bin realisá ku p’e “masha dushi mes” kiermen muchu mas ku “alegria di bida”, pero ta un ekspreshon di su tremendo gratitut pa tur kos den su bida, mas ainda e bendishon di ta na bida. Ku e palabranan “masha dushi mes” Cedricus ta ekspresá su aktitut di gratitut na bida. For di dia ku mi a komprendé esaki mi tambe a adoptá e palabranan aki ku kontinuamente ta baila den mi mente. Kiko ku pasa mi ta rekòrdá mi mes ku bida ta “masha dushi mes” i kon afortuná nos ta. Masha dushi mes ta e rekordatorio tur dia ku nos mester tin un aktitut di gratitut. Hopi hende ta puntra mi ta unda mi a saka e frase aki ku tur ora ta resaltá den mi artíkulonan. Na yanüari 2010 despues ku un teremoto masha fuerte a asotá Haiti mi a manda un artíkulo den korant ku e 5 título “UN AKTITUT DI GRATITUT”. E artíkulo ta splika entre otro lo siguiente: “E situashon di Haiti realmente ta pone hende pensa i purba di pone e realidat ku nos ta bibando aden den perspektiva. Pa por komprendé loke mi kiermen, lo ta bon pa komprendé kiko Haiti tabata pasando aden promé ku e teremoto ku a yega 7.0 riba e eskala di Richter. Haiti tin un poblashon di 9 mion habitante di kual 80% ta sin trabou. Den e último dos dékadanan el a pasa den su pió situashon ekonómiko den su historia. 75% di e muchanan no ta bai skol, mitar no ta vakuná i 90% di nan ta sufri di malesanan manera parásito intestinal. Mas ku 60% di e poblashon no tin akseso na salubridat públiko i 1 den kada 16 persona ta karga e vírùs di HIV/AIDS. Hopi hende ta sufri di Tuberkulósis i Malaria. Haiti ta e pais mas pober den nos hemisferio i mayoria di haitiano ta biba ku ménos di $2.00 pa dia. Poko mas ku 50% di e poblashon por skirbi i lesa. Asina mes, e pueblo di Haiti ta konosí pa su positivismo, fe grandi, sobrebibensia i speransa. Pensando bon, nos na Aruba ta hopi afortuná. Kompará ku otronan rònt mundu manera esunnan ku ta biba na Haiti nos ta den un paraiso. Mayoria di nos tin trabou, nos tin kosnan material, nos tin nos famia, nos tin nos amigunan, nos tin nos salú. Asina mes hopi di nos ta kana ta keha riba tur kos, ta kudishá, odia, ta tene renkor, hasi redashi i otro kosnan negativo na lugá di tuma nos tempu pa ta agradesido pa loke nos tin kompará ku hopi otronan rònt mundu ku no tin nada tin mes. Portá próksimo biaha lugá di keha nos pareha, nos mama, nos tata, nos yunan òf nos rumannan, laga nos ta agradesido ku nan ta ku nos ainda ... kuantu di esunnan ku a pèrdè un di nan sernan kerí awe lo tin e gran deseo di pasa maske ta 5 minüt mas ku nan. Próksimo biaha si e kuminda ku lo bo kome no ta smak dje bon ei, na lugá di keha, pensa kuantu hende rònt mundu tin hopi dia sin kome i lo tin gana di un pida pan blanku seku mes. Próksimo biaha ku nos pensa di hasi redashi, kudishá, odia, renkorá, di ta yalurs, di tin envidia òf pensa pa tuma vengansa, portá nos por konsiderá pa usa nos emoshon humano i dirigi’é na algu mas positivo. Portá nos por konsiderá di tin un aktitut di gratitut i gradisí nos Kreador pa tur e kosnan bon ku nos tin, pa tur e kosnan ku tur dia nos ta bendishoná di tin. Di realisá i apresiá ku kompará ku hopi otro, bida ta MASHA DUSHI MES! - Business Etiquette - Dress Etiquette - Wine & Dine Etiquette - Telephone Etiquette - Social Etiquette - Communication/Teambuilding - Hospitality training - Customer Service - Time Management www.trainingconsultancy2000.com info@trainingconsultancy2000.com

Avanse edition 4

Pages Overview